ಗುರುಗಳು‍

ಗಮಕಿ ಹು ಮ ರಾಮರಾಧ್ಯರು ಗಮಕ ಗುರುಗಳಾಗಿ ಇವರ ಭಾವ–ರಾಗ ಜ್ಞಾನವನ್ನು ವೃದ್ಧಿಪಡಿಸಿದರು. ಅಲ್ಲದೇ ವಿದ್ವಾನ್ ಗೋಪಾಲಕೃಷ್ಣರಾಯರಿಂದ ಪಿಟೀಲು ವಾದನವನ್ನು, ವಿದ್ವಾನ್ ಹಾವೇರಿ ಪ್ರಹ್ಲಾದಾಚಾರ್ಯ ಅವರಲ್ಲಿ ಸಂಗೀತಾಭ್ಯಾಸ ನಡೆಸಿದರು. ಮುಂದೆ, ಗಮಕಿ ಜಿ ಎ ಅನಂತಪದ್ಮನಾಭಯ್ಯ ಮತ್ತು ಗಮಕಿ ಎಂ ರಾಘವೇಂದ್ರರಾವ್ ಅವರಲ್ಲಿ ಕಾವ್ಯವಾಚನದ ಸೂಕ್ಷಮಾoಶಗಳ ಪರಿಚಯವಾಯಿತು.

ಗಮಕ ಕಲೆಗೆ ಅವಶ್ಯವಾದ ಸಾಹಿತ್ಯಾಭ್ಯಾಸವನ್ನು, ದಿಬ್ಬೂರು ಶ್ರೀನಿವಾಸರಾಯರು, ರಾಮಚಂದ್ರಶರ್ಮ ತ್ಯಾಗಲಿ, ಎನ್ ವಿ ಅನಂತರಾಮಯ್ಯ, ಪ್ರೊ. ಟಿ ಕೇಶವ ಭಟ್ಟ ಅವರಲ್ಲಿ ಅಭ್ಯಾಸ ಮಾಡಿದರು. ಅಲ್ಲದೇ ತಮ್ಮ 48ನೇ  ವಯಸ್ಸಿನಲ್ಲಿ  ಕನ್ನಡದಲ್ಲಿ  ಎಂ ಎ ಪದವಿಯನ್ನು ಪಡೆದರು. ಈ ಎಲ್ಲ ವಿಶೇಷ ಅಭ್ಯಾಸಗಳಿಂದಾಗಿ ಶಂಕರನಾರಾಯಣ್ ಅವರು ಕಾವ್ಯವಾಚನ ಮತ್ತು ಕಾವ್ಯರಚನೆಗಳಲ್ಲಿ ತೊಡಗಿಸಿಕೊಂಡರು. 

‍ಕನ್ನಡ ಕಾವ್ಯ ಸಾಹಿತ್ಯ ಹಾಗೂ ಗಮಕ ಕಲೆಯ ಪ್ರಚಾರ

ತಮ್ಮ ತಂದೆ–ತಾಯಿಯರ ಆಶಯದಂತೆ, 1964ರಲ್ಲಿ “ಕಾವ್ಯ ಪ್ರಚಾರ ಮಂಡಳಿ” ಎಂಬ ಸಂಸ್ಥೆಯನ್ನು ಸ್ಥಾಪಿಸಿ, ಸುಮಾರು  25 ವರ್ಷಗಳ ಕಾಲ ಕನ್ನಡ ಕಾವ್ಯ ಸಾಹಿತ್ಯ ಹಾಗೂ ಗಮಕ ಕಲೆಯ ಪ್ರಚಾರ ಕೈಗೊಂಡರು. ಶಂಕರನಾರಾಯಣ್ ಅವರು ಆಕಾಶವಾಣಿ ಮತ್ತು ದೂರದರ್ಶನ ಕಲಾವಿದರೂ ಆಗಿದ್ದರು. 

ಇವರು ತಮ್ಮ ಕಾವ್ಯ ಕೃಷಿಯಲ್ಲಿ, ಕವನ ಸಂಕಲನಗಳು, ವಿಚಾರ ಪ್ರಬಂಧಗಳು, ಷಟ್ಪದಿ ಕಾವ್ಯಗಳನ್ನು ರಚಿಸಿದ್ದಾರೆ. ಇವರ ಎಲ್ಲ ಕೃತಿಗಳ ಮಕುಟಮಣಿಯಾಗಿ “ಭೀಮಸೇನ ವಿಜಯ” ಹಾಗೂ “ಶ್ರೀ ಸೀತಾದರ್ಶನಂ” ಎಂಬ ಸಾವಿರಕ್ಕೂ ಮೀರಿದ ಪದ್ಯಗಳಿಂದ ಕೂಡಿದ ಬೃಹತ್ ಕಾವ್ಯಗಳು ಇವರ ಕಾವ್ಯಾನುಭವದ ಪೂರ್ಣ ಫಲ ಎಂದೇ ಹೇಳಬಹುದು.

‍ಪ್ರಶಸ್ತಿ ಹಾಗೂ ಪುರಸ್ಕಾರ

ಶಂಕರನಾರಾಯಣ್ ಅವರ ಗಮಕ ಕಲಾ ಸೇವೆಯನ್ನು ಪರಿಗಣಿಸಿ, ಕರ್ನಾಟಕ ಸಂಗೀತ–ನೃತ್ಯ ಅಕಾಡೆಮಿಯ “ಕರ್ನಾಟಕ ಕಲಾಶ್ರೀ” ಪ್ರಶಸ್ತಿಯನ್ನು 2001ರಲ್ಲಿ ನೀಡಲಾಗಿದೆ.